هذه سابع نشرة من سلسلة أكبر مشاكل المشاريع

اسأل صاحب المشروع شنو يسوي مشروعك بالضبط؟ يعطيك جواب طويل، يذكر لك عشر خدمات، وتطلع من عنده مو فاهم شنو يسوي

لو انت ما تقدر توصف مشروعك بجملة وحدة، عميلك بعد ما يقدر

هني المشكلة، اسمها ان هويتك ضبابية. محد يعرف انت منو، وشنو تمثل، وليش يييك انت بالذات مو غيرك

صاحب المشروع اللي يبي يخدم الكل، ويسوي كل شي، ويلحق كل فرصة، الناس ماتعرفه ولا تذكره. لان اللي يمثل كل شي ما يمثل ولا شي، والعميل ما يتذكر الا الي واضح

احد المشاريع كان يقدم تصميم وتسويق وايفنتات واستشارات، كل ما سألته شنو مشروعك يبدأ من جديد يشرح. قلت له لو يسألك جارك شنو تشتغل، شنو بتقول بجملة وحدة؟ ما عرف. ساعدته على انه يختار شي واحد يبرز فيه

ادري انك تخاف لو تركز على شي واحد تخسر باقي الفرص، بس الحقيقة عكس هذا، الي يعرفونك بشي واحد اهم اول ناس يرجعون لك بأشياء ثانية

خلني اعطيك اول خطوة تكشف لك لو هويتك واضحة او لا

اسأل ٥ من عملائك لو تشرح مشروعي لصديق شنو بتقول؟ لو جاوبوا اجوبة مختلفة، هويتك ضبابية ولازم توضحها

بس معرفة المشكلة شي، وبناء هوية واضحة تخليك الاول في مجالك بدون ما تخسر فرصك شي ثاني، وهذا يعتمد على وضع مشروعك انت بالذات

الزبدة

الي يبي يسوي كل شي، ماراح يعرف يسوي شي وراح يطلع من السوق

اخوك

شرايك بنشرة اليوم ؟ حتى لو ما عجبتك، رايك مهم

مالحقت على كل نشراتنا من البداية ؟ اضغط هنا وشوفهم

اذا تعرف احد بفيده هذا المحتوى، لا تبخل بالفائدة وشاركه هذا الايميل

واذا هذه النشرة واصله من صديق، اشترك مجاناً ليصلك جديدها