اغلب اصحاب المشاريع لما يشوفون العميل يفاوض ويروح للارخص، يقولون العميل يبي الرخيص
بس العميل ما يبي الارخص، العميل يبي يتأكد انه ما بيخسر، وانت ما عطيته سبب يطمن
لان الناس ما تشتري منتجك، تشتري الي بيصير لها بعد ما تشتري
من خبرتنا في بيع المشاريع وان شايفين الالف من المشاريع الي تمر علينا ان كان مبيعاتها بالملايين الدنانير او اقل، شفنا مشاريع تبيع نفس الخدمة بسعر اعلى من المنافس وعملائها ناطرين بالدور، ومشاريع ارخص منها وادور العميل دواره
لان الفرق مو بالمنتج، الفرق بالي يحيط المنتج
شنو الي يحيط المنتج
العميل قبل ما يدفع عنده ثلاث اسئلة ما يقولها لك، شنو بياخذ بالضبط، متى بيستلم، وشنو يصير لو ما عجبه
وكل سؤال ما تجاوب عليه، يتحول لسعر، لان ماكو شي ثاني يفرق بينك وبين غيرك
والاختبار سهل، اسأل نفسك، لو حطيت عرضك جدام عرض المنافس وشلت السعر من الاثنين، العميل شلون بيختار؟
لو ماكو جواب، فالسعر اهو الي بيختار عنك
الزبدة
العميل ما ينحاش من سعرك، ينحاش من الغموض، ووضوح عرضك يخليه يدفع اكثر وهو مرتاح
اخوك
شرايك بنشرة اليوم ؟ حتى لو ما عجبتك، رايك مهم
مالحقت على كل نشراتنا من البداية ؟ اضغط هنا وشوفهم
اذا تعرف احد بفيده هذا المحتوى، لا تبخل بالفائدة وشاركه هذا الايميل
واذا هذه النشرة واصله من صديق، اشترك مجاناً ليصلك جديدها
