قبل ما ابدأ، ابي اوقف واقول لكم شكر من القلب

وايد منكم عبى استبيان التقييم وكتب لي رايه بصراحة، وانا اقرا كل تعليق وتقييم

كلامكم الطيب وملاحظاتكم ومقترحاتكم، كلها توصلني وتفرق معاي وتخليني اطور النشرة لكم اكثر واكثر

شكراً انكم معاي، وشكراً على وقتكم وصدقكم، هذا الي يخليني اكمل

هذه ثامن نشرة من سلسلة أكبر مشاكل المشاريع

تصرف فلوس على اعلانات، تتعب عشان تجيب عميل جديد، يشتري منك مره وحده وبعدها يختفي، وترجع من اول وجديد تدور عميل ثاني بنفس التعب ونفس الصرف

المشكلة انك ما تحتفظ بعميلك، كل تركيزك على الجديد وناسي الي اشترى منك قبل

العميل الي اشترى منك مره، اسهل وأرخص بمرات انه يشتري ثاني، من واحد ما يعرفك ولا جربك. بس اكثر اصحاب المشاريع يركضون ورا عملاء جدد ويتركون كنز قاعد قدامهم، ناس بس تحتاج تذكير او لمسة اهتمام عشان يرجعون

احد المشاريع كان كل شهر يصرف على اعلانات عشان عملاء جدد، وربحه ثابت ما يتحرك. سألته جم عميل من الي اشتروا منك قبل رجعوا مرة ثانية؟ ما كان يعرف الرقم اصلاً. بدينا نتواصل مع عملائه القدامى برساله بسيطة نسأل عنهم ونذكرهم فينا، وخلال شهر رجعوا عملاء كنا نحسبهم راحوا، وارتفع ربحه بدون ما يصرف دينار زيادة على الاعلانات

ادري ان جذب العملاء الجدد يحمس، بس الفلوس الحقيقية في الناس الي جربوك وثقوا فيك

خلني اعطيك اول خطوة بسيطة

طلّع اخر ١٠ عملاء اشتروا منك، وارسل لهم رسالة شخصية تسأل عنهم وتذكرهم انك موجود، مو عرض ولا بيع بس اهتمام، وشوف جم واحد يرد ويرجع

بس هذي اول خطوة، وبناء نظام كامل يخلي عميلك يرجع لك بشكل دائم شي ثاني، وهذا يعتمد على مشروعك انت بالذات

الزبدة

الي يركض ورا عملاء جدد وينسى القدامى يظل يصرف ويتعب بلا نهاية، والي يعتني بعملائه يبني مشروع يكبر من نفسه

اخوك

شرايك بنشرة اليوم ؟ حتى لو ما عجبتك، رايك مهم

مالحقت على كل نشراتنا من البداية ؟ اضغط هنا وشوفهم

اذا تعرف احد بفيده هذا المحتوى، لا تبخل بالفائدة وشاركه هذا الايميل

واذا هذه النشرة واصله من صديق، اشترك مجاناً ليصلك جديدها