هذه سادس نشرة من سلسلة أكبر مشاكل المشاريع

عندك عميل كبير، ياخذ اغلب وقتك واغلب دخلك، وكل شهر يدفع لك وانت مرتاح

تحس ان مشروعك ثابت وقوي لان هذا العميل معاك

بس هني المشكلة، اللي تحسه اكبر نقطة قوة عندك اهو اكبر خطر على مشروعك

صاحب المشروع اللي معتمد على عميل واحد، يبني كل شي على شخص وحد ممكن يمشي في اي لحظة. يغير رايه، يلاقي ارخص، يسكر مشروعه، او حتى ظروفه تتغير، وانت فجأة تخسر اغلب دخلك بيوم وحد

احد المشاريع كان ٧٠٪ من دخله من عميل واحد كبير. سألته لو هذا العميل وقف باجر شنو يصير فيك؟ سكت. قلت له انت مو صاحب مشروع، انت موظف عند هذا العميل وما تدري. قعدنا اشتغلنا على ان يورد عملاء جدد، وبعد ٤ شهور صار عنده ٥ عملاء وكل واحد ياخذ جزء، ولما فعلاً مشى العميل الكبير بعد سنة ما حس فيها لان دخله صار موزع

ادري ان العميل الكبير مريح ويغطي مصاريفك، بس الراحة هذه اهي الي تسوي المشاكل والخطر

خلني اعطيك اول خطوة تكشف لك حجم خطرك

احسب جم بالميه من دخلك ايي من اكبر عميل عندك، لو طلع اكثر من ٢٥٪ انت في منطقة خطر ولازم تتحرك من اليوم

بس معرفة الرقم شي، وبناء خطة تنوع فيها دخلك وتحمي مشروعك بدون ما تخسر عميلك الكبير شي ثاني، وهذا يعتمد على وضع مشروعك انت بالذات

الزبدة

العميل الكبير نعمة بس لا تخليه خطر عليك، المشروع القوي هو الي لو مشى اي عميل يظل واقف، مو اللي يعيش ويموت على شخص واحد

عندك عميل واحد ياخذ اغلب دخلك وتبي تعرف شلون تنوع بامان؟ بالاستشارة نشوف وضعك ونحط لك خطة تحميك

اخوك

شرايك بنشرة اليوم ؟ حتى لو ما عجبتك، رايك مهم

مالحقت على كل نشراتنا من البداية ؟ اضغط هنا وشوفهم

اذا تعرف احد بفيده هذا المحتوى، لا تبخل بالفائدة وشاركه هذا الايميل

واذا هذه النشرة واصله من صديق، اشترك مجاناً ليصلك جديدها