مو كل زبون ... زبونك

أكثر خطأ أشوفه عند أصحاب المشاريع إنهم يبيعون حق الكل
كل من يمر عليهم يعتبرونه عميل محتمل

لكن الواقع؟
مو كل زبون …. زبونك
ومو كل عميل لازم تلاحقه وتبيعه

قبل فترة ياني اخونا “بو فهد” صاحب مشروع صغير يبيع منتجات يدوية
قعد جدامي وقال: عبدالله، أنا أبي أبيع لأي أحد… أهم شي أبيع، ما أبي أخسر

سألته: منو عميلك المثالي الي صج اذا شفته راح تعرف هذا عميلك وهذا شكله؟
رد بسرعة بدون تفكير وقال: الكل… أي واحد يشتري الكل يحب هل سوالف وشغلي قوي ومايحصلونه بالسوق بس هذه المشكله
لان مافي شي يناسب العالم كله، ربنا خلقنا مختلفين ولا شي نتشابه فيه فـ مستحيل اتيب شي بتبيعه ويناسب كل البشر

فـ عشان جذي في شي اسمه تسويق، وفي شي اسمه براندينق وفي شي اسمه أرسم عميلك المثالي وفي شي اسمه برسونا وكل هذه الأشياء تساعدنا نفكر ونحدد ونوصل حق العميل المثالي والمحتمل الي ممكن يشتري خدمتنا او منتجنا

قعدت قعده مطوله مع “بو فهد” عشان ندرس ونحلل العميل المثالي فـ قعدنا نفكر
منو يقدّر القطع الي تتسوه بالايد ؟ ليش الواحد يشتريها وشنو يسوي فيها ؟ شلون ممكن القطعه يكون لها قيمه عند هذه الناس ؟ جم اعمار الي يشترون هذه المنتجات ؟ بأي لغه لازم نكلمهم ؟ وين نحصلهم واتساب ولا انستغرام ولا تيكتوك ؟ يداومون ولا متقاعدين ؟

شنو سوينا؟
١- ركزنا بالصور والرسايل على حصرية القطع وعلى طريقة تشكيلها وتصنيعها اول بأول
٢- سوينا "دروب" عدد محدود بوقت معين يتم عرض فيه القطع
٣- تكلمنا بنفس اللغه الي يتكلم فيها العميل المثالي الي رسمناه حق المشروع

النتيجة؟
المبيعات زادت، وصار عنده عملاء يرجعون يشترون منه باستمرار
مو لأنه وسّع السوق… بالعكس، لأنه ضيّق السوق وحدد منو يخاطب

الخلاصة؟
مو كل زبون زبونك
كل ما حددت عميلك المثالي، كل ما كان البيع أسهل والربح أكبر

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها