لما تتعب نفسياً من المشروع شتسوي ؟

تكلمت معاك بنشرة الاسبوع الي فات عن اكثر شي يتعب اصحاب المشاريع بس اليوم ابي اقولك شنو لازم نسوي لما نتعب !! لان كل يوم بتمر بهذا الشعور ف لا تظن انت بروحك

التعب الي نمر فيه مو بالجسد .. نتعب نفسياً

لما تحس إنك قاعد تعطي كل اللي عندك، بس النتائج ما تمشي بسرعة مثل ما انت تبيها

لما تقوم الصبح، مو متحمس، وتقول بينك وبين نفسك: ليش مو ماشيه معاي بس تعبت

تعبان نفسياً، الأفكار تاكل تفكيرك، النجاحات الي حولك تهدم طموحك وتخليك تشك في قدراتك ونفسك

بس احب اقولك، هذا الاختبار الحقيقي لكل مبادر ناجح

الاختبار مو وقت النجاح… الاختبار وقت الركود، التعب، الشقى، الخسارة، السعي بدون نتيجة ملموسة

قاعد اكتب لك هذه النشرة وانا عارف الشعور بالضبط وكل ومبادر حقيقي يمر فيها … بس في مبادر يقول شكراً انا ماقدر اكمل، وفي مبادر يقول انا لها وراح انجح بهذا المشروع او غيره، هذه الرحلة لي انا

كل الي تحتاجه في هذه المرحلة من التعب، باااانزين

كل سياره سريعه وجميلة تتعطل وتوقف اذا خلص بانزينها، بالضبط نفس طاقتك وقوتك ومشروعك، اذا ماعرفت شنو نوع البانزين الي تحتاجه عشان تستمر بقيادة هذه الرحلة، راح توقف وتتعطل

البانزين ممكن يكون

١- يوم راحة

٢- ترتيب اولويات

٣- الدعاء وقرب اكثر الى ربنا سبحانة

٤- قعده صريحه مع نفسك وتراجعك حلمك وطموحك

ممكن يكون اي شي ثاني، انت تعرف نفسك اكثر من اي احد، بس الاهم لا توقف 

حتى لو تحس إنك واقف مكانك… أنت قاعد تبني شي بداخلك، صبر، ووعي، وتجربة

المشاريع ما تنجح لأن أصحابها ما تعبوا، تنجح لأنهم تعبوا وما انسحبوا

تذكرها دايمًا، خصوصاً في الأيام اللي تحس فيها إنك مو قادر تكمل

استمتع بالرحلة

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها