اكثر غلطة بالمبيعات تخسرك عملاءك

وايد أصحاب مشاريع يركزون على شغلة وحدة

اني ابي أبيع بأي طريقة

فـ شنو يسوون؟

يحنون على العميل، يشكلون عليه اتصالات وضغط، ويظنون كل ما ضغطوا أكثر… راح يدفع العميل ويصكر الصفقة اي عميل ينحاش من الي يحن عليه ويخاف منه ويحس ان بس يبي يبيعة ف يصير الموضوع خوف اكثر ومايشوف فيك اي قيمة

المبيعات مو مجرد بيع واخذ فلوس، المبيعات بناء علاقة عشان يكبر معاك هذا العميل ويرتاح لك ويركض وراح ويطلع الدينار من جيبه من كل خاطر مو مغصوب لانك قاعد تحن عليه وعشان توصل لهذه المرحلة .. تحتاج تكون مستشار وليس بياع

بمعنى ان توجة العميل للمنتج او الخدمة الي حق مصلحته مع حساب الفايده حقك اكيد بس الهدف انك توجه وكأنك مستشار تقوله شنو الزين له واهو صاحب القرار بس شرط انك ما تضيعه بالاختيارات

أذكر مره صاحب مشروع كان يكلمني ودايماً متحبط ويكره البيع

يقول الناس ما ترد علي! أحاول أبيع لهم ويطنشوني شفيهم البشر غريبين

لما راجعت معاه أسلوبه، اكتشفت إنه ما يعطي العميل فرصة يتكلم أصلاً. كل تركيزه، بتشتري الحين أو لأ ؟ وكله يركز على السعر ومافي اي قيمة يسولف عنها

غيرنا الأسلوب: صار يسأل العميل

شنو المشكلة الي قاعد تواجهها؟ شنو قاعد تدور بالضبط؟

صار يسمع أكثر من ما يتكلم

والنتيجة؟ نفس العملاء اللي كانوا يحقرونه ويتهربون… صاروا زباااين وعندهم ولاء

٣ خطوات بسيطة تبني علاقة مع عميلك

١- اسمع أكثر من ما تتكلم

٢- اسأل عن احتياجاته قبل ما تعرض منتجك

٣- تابع معاه بعد البيع كأنك صديق مهتم، مو مجرد بائع

الخلاصة

المبيعات مو فن الإقناع… المبيعات فن الفهم

افهم عميلك، وبتشوف البيع يصير نتيجة طبيعية، مو معركة

للتذكير

لاتنسى باجر الساعة ٨ مساءً عندنا ورشة اونلاين مجانية عن شلون تشتري مشروعك بأمان وضمان

واااايد مهمة لكل واحد ناوي يشتري مشروع لازم يدخلها عشان مايطيح في اغلاط ومشاكل اهوا غنى عنها… بعطيك الزبدة وخبرة ٦ سنين في مجال بيع وشراء المشاريع الي بعنا فيها اكثر من ٢٥٠ مشروع ما شاء الله، حياك الله واشوفك بالورشة

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها