اذا بتبيع مشروعك .. انتبه لهذه النقطه

إذا انت صاحب مشروع وفي بالك يوم من الأيام تبيع مشروعك أو تدخل شريك أو حتى بس تبي مشروعك يكون جاهز للبيع يوماً ما

أبيك تعرف شي مهم شي وايد من الناس ما ينتبه له إلا متأخر

أغلب أصحاب المشاريع يظنون إن المشتري يهتم بس بالأرقام

ربح؟ نمو؟ مبيعات؟

اكيد هذه مهمه لكن مو اهيا الي تحسم القرار

اللي يحسم القرار فعلًا هو سؤال واحد يدور في بال أي مشتري .. شنو بيصير بعد ما أستلم المشروع؟

هل المشروع راح يمشي بدون صاحبه؟

هل القرارات واضحة؟

هل الشغل معتمد على نظام… أو على شخص واحد؟

هل المشاكل واضحة اليوم، أو راح تطلع باچر فجأة؟

المشتري قبل الإغلاق ما يكون قاعد يفكر بالفرص

قاعد يفكر بالمخاطر، قاعد يسأل نفسه: هل أقدر أنام مرتاح بعد ما أوقع؟

وهذا سر نجاح الصفقات .. انك انت كصاحب مشروع تكون جاهز ومجهز المشروع ونفسك هذا حق الوقت عشان المشروع يكون فرصة للمشتري وتكون انت مصدر راحة للمستثمر والمشتري ومايخاف منك

شنو تقدر تسوي من اليوم؟ (بخطوات بسيطة)

مو لازم تبيع الحين، بس إذا سويت هذه الـ ٣ اشياء من الحين مشروعك يصير أقوى بأي سيناريو

١- خفّف اعتماد المشروع عليك شخصيًا

اسأل نفسك: لو غبت شهر، شنو يوقف؟ وحاول تطور هذا الشي الي ممكن يوقف ويصير يشتغل بدونك

٢- جهز ألية التشغيل واضحة ومكتوبة

مو في بالك… على ورق

٣- اعرف نقاط ضعفك قبل غيرك

لا تخلي المشتري والمستثمر يكتشفها، لان يا راح يكنسل المشروع او يكسر بسعرك .. ف ماتبي يصيد عليك شي

الزبدة

مشروعك قيمته مو بس بالأرباح، قيمته بالراحة اللي يعطيها للي راح يستلمه بعدك ويستفيد

وكل ما كان أوضح… كل ما صار أقوى سواء كملت فيه، أو قررت تبيعه يوم من الأيام

ورحلة المشاريع دايم فيها تعلم… والشاطر اللي يتعلم قبل لا يطيح بالغلط

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها