نصيحتي لك قبل لا تدخل السوق

اذا عندك فكره وبتسوي مشروع، بقولك درس تعلمته ومتأكد بيختصر عليك شغل سنين

اغلب الناس لما بتسوي مشروع تبلش تفكر بالفكره الي تعجبهم ويطيرون يجهزون اللوقو، الاسم ويدورون على محل ومقاول ويمشي ويصرف على امل فكرته تضرب ويصير مليونير

وبعد اشهر من التشغيل ومن يشوف الحقيقة والمّر، يقول السوق تعبان والناس ماتبي تشتري وتصرف وللاسف الاغلب يطلع من السوق

الأفكار كثيره وعمرها ماتخلص، وفكره وحده من ١٠٠٠٠٠٠ ممكن تنجح ليش؟

السوق ما يهمه فكرتك… السوق (الناس) يهمه مشكلتك وقيمتك

خلال شغلي في منصتنا مُشتري، بيع وشراء المشاريع، شفنا اكثر من ٥ الالف مشروع شفنا الربحان والخسران وشتى اشكال المشاريع

الي كان يميز الربحان والناجح شنو ؟

١- يعرف عميلة المثالي

لان مو كل الناس جمهورك

في فئة وحده وشكل واحد من الناس والعملاء اهو الي تشتغل عليه، مافي مشروع بالعالم يستهدف الناس كلها، كل مشروع له عميلة الخاص الي يفهمه ويفهم لغة التواصل معاه

٢- يعرف شنو مشكلة وحاجة العميل

إذا ما تعرف المشكلة الحقيقية لعميلك الي اخترت تشتغل له وتقدم له خدمتك او منتجك

حتى لو شغلك مافيه غلطة وحده، مافي عميل بيشتري منك

قيسها على نفسك، شوف حولك من الأشياء الي تشتريها والي تنتمي لها ليش قاعد تصرف عليها ؟

٣- يعرف ليش يشترون منه

إذا ما عندك قيمة واضحة، ف مشروعك مجرد خيار اضافي بالسوق، المقارنه بينك وبين المنافسين سهله

تحتاج شي يطلعك اعلى الهرم عشان تخلي المقارنة وصير صعبه على العميل

اقوى المشاريع الي شفتها في حياتي، الي بدت بعميل واحد، بمشكله وحده واضحة، اهني راح تعرف منو جمهورك وشنو طلباته وشنو حياته وشنو يحتاج واهني راح تعرف شلون تحصل من هذا العميل عدد اكبر لان راح تعيش بينه وبين اهله والناس الي تشابهه

الكلام الي قاعد اشاركك فيه يمكن سامعه او تشوف سهل

الله يشهد ان هذا من اهم اسباب نجاح المشاريع والي انا خسرت فيها مئات الالف عشان اتعلمها

ولو تطبيق هذه الدروس على ارض الواقع سهله، جان كل المشاريع ناجحة وعندها عملاء ومبيعات وعايشه بالعسل

رحلة المشاريع متعة، لان لازم كل يوم تتعلم ومافي درس واحد يكفيك لنجاح مشروع

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها