أصعب وأكثر درس مكلف

الخوف والخسارة… محد يتمناهم، بس صدقني اهم أكثر شي يعلمونك عن نفسك قبل لا يعلمونك عن المشروع وانت هذا الي تحتاجة

تدري ليش ؟

خلني اقولك شنو صار معاي…. شوف

لما فتحت أول مطعم لي، كنت متحمّس… بس ما كنت جاهز. صارت معاي وايد مشاكل وحسيت بشعور الضياع وكل يوم ادخل المطعم اخاف وقلبي يرقع… اكتشفت بسرعة إني ما أتحمّل ضغط التفاصيل اليومية

١- تدريب الموظفين

٢- ادارة المطبخ

٣- التعامل مع العملاء والمشاكل الي تحصل معاهم

٤- متابعة كل صغيرة وكبيرة

هذه الاشياء تستهلك وقت وطاقة وتفكير… بدون ما تعطيني إنتاجية ولا إحساس بالانجاز، على الرغم احب التفاصيل والتركيز ولكن اكتشفت اني ما انفع اصير مسؤول عن التشغيل وفي ناس وااايد اشطر مني ويعشقون تشغيل المطاعم والشركات ويتحملون هذه المسؤولية

ولكن هل استسلمت وقلت انا ما اصلح حق شي ؟؟

هذه التجربة كشفت لي قوتي وعرفت انا شنو شاطر فيه

فـ بمشروعي الثاني اشتغلت على المهام الي توقعت انا شاطر فيها … وطلع هم مو هذا المطلوب !!! ما قعدت في نفس المكان واستسلمت .. كملت المسيرة… تعلمت وعرفت نفسي اكثر واكثر ورحت تخارجت وبعت المشروع الثاني واهني اسسنا منصة مُشتري الي على اساسها تأسست عشان أتخارج من المطاعم والكافيهات الي انا مضيع نفسي فيهم

بصراحة … اهني عرفت نفسي .. طلعت

١- احب أنفّذ بسرعة

٢- قوي في المتابعة، في البيع، في فهم الناس

٣- عرفت نفسي أكثر في التسويق والمبيعات والاستراتيجيات

اهني فهمت اللعبة ودايماً اقول الف الحمدالله على كل خسارة و خوف ورقعة قلب مريت فيها

الهدف انك تعرف نفسك في اي طريقة ممكنة، وماراح تعرف الا لما تجرب وتجرب وتجرب

الهدف تفهم وين قوتك؟ وين ضعفك؟ وين تحط تركيزك؟

وهذه رحلة الخوف والخسارة خلتني اعرف وين اركز الحين ووين بكون سعي وجهدي كل يوم عشان اقدم اكبر قيمة واحصل على اكبر مردود

الخلاصة

المشروع ممكن بأي لحظة تخسرة … بس اذا عرفت نفسك، عمرك ماتخسر

اعرف نفسك… وحط قوتك في مكانها الصح

شلون يا عبدالله؟ سهله، بس قوم جررررررررررررررررررررررررررب

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها