وايد منا من أصحاب مشاريع يشتغلون طول الأسبوع ونحس آخر الشهر نفس المكان ماسوينا شي
والصراحة؟
مو لأنك مو قاعد تتعب وتجتهد
بس لان قاعد تشتغل وتنفذ الاشياء الي جدامك بس بدون ما تواجهة المشكله الاساسية ف دايماً نلف وندور حول الاشياء الاساسية ونشتغل على المهام الثانوية
راح ابسطها لك اكثر
كصاحب مشروع مو مسؤوليتك تنفذ المهام وانت تصير بتاع كلو وكل شي يوقف عليك
عندك ٣ مسؤوليات من تقرر تسوي مشروع
١- تجيب فلوس بحساب البنك
٢- توظف فريق قوي يشيل الشغل
٣- توصل الاستراتيجية للفريق بشكل واضح عشان ينفذون
الحين عشان توصل لهذه المرحلة ويكون هذا شغلك الشغال، تحتاج تركيز
ركز معاي في الي بقوله لك
تحتاج تختار مشكلة عندك وتواجها يوم كامل وماكو ذرة تشتت بأي مهام ثانية
التركيز اهو السر اهو الخلطة اهو النجاح
مشكلتنا ان نبي نسوي كل شي والف فكرة تطري في البال ومانعرف نقول لا
ف تلاقي واحد حتى مشروعه مادخل ١٠٠ دك راح يسوي مشروع ثاني وثالث
تبي تنجح ؟ تبي مشروعك يكبر ؟
ركز
ركز عشان تجيب فلوس بحساب البنك وتوظف فريق قوي وتعطيه استراتيجية واضحة ينفذها ويدوس معاك وكلكم تكبرون سواا
(بتشوف بعدها حال مشروعك شلون يتغير .. (اذا كان المشروع له سوق
ابيك تسوي هذا الشي مره بالاسبوع
المفروض كل يوم بس جربها مره بالاسبوع
كل شي حاطه على الصامت، بس ورقة وقلم
واكتب
١- شنو اللي دخل فلوس هذا الأسبوع؟
أي خدمة/منتج/عميل؟
٢- شنو اللي خسرك فلوس/وقت؟
مصاريف؟ شغل ما له عائد؟ تضييع وقت؟
(هني تتعلم من الواقع مو من التوقعات)
٣- شنو أكبر مشكلة لازم تنحل الحين؟
لا تختار 3 مشاكل. اختار وحدة بس.
٤- شنو خطوة وحدة راح تسويها الأسبوع الجاي؟
خطوة واضحة تقدر تقيسها
مو تطوير ولا ترتيب .. على الي عندك شنو تحتاج تسوي عشان تحل المشكلة الي كتبتها بسؤال رقم ٣
الزبدة
وظيفتك بتكون حلال مشاكل طول عمرك بالمشروع
وبتواجه وتحل مشكله مشكله لي ما توصل لهدفك ولبناء مشروع مايهزه ريح
جربت الي قتلك عليه وارجوك ركز بمشكله وحده
وشيل كل الخدمات والتطوير والتوسع والافكار الجديدة وبس ركز بمشكلتك الحقيقية عشان تحلها
🙏🏼 واذا ضبطت امورك، لاتنسى تدعيلي
اتمنى لك كل التوفيق والنجاح يارب
اخوك
شرايك بنشرة اليوم ؟
اذا مالحقت على كل نشراتنا من البداية، اضغط هنا وشوفهم
واذا تعرف احد بفيده هذا المحتوى لا تبخل عليه بالفائدة وشاركه بهذا الايميل
واذا هذه النشرة واصلتك من صديق، اشترك الان مجاناً ليصلك جديدها
