وايد أصحاب مشاريع يقولون
“مشروعي زين… ليش محد يشتريه؟”

والصراحة؟
مو دايم المشكلة بالأرباح ولا بالمبيعات

المشكلة غالبًا تكون بشي واحد ان المشتري ما يحس بالأمان

المشتري قبل لا يفكر شنو الفرصة؟ يفكر شنو المخاطر؟

يقول بينه وبين نفسه
إذا استلمت المشروع… شنو ممكن يخرب علي؟

ف دايماً ألبس قبعته عشان تعرف شنو لازم تجهز وتسوي

١- اذا المشروع ما يمشي الا فيك
إذا كل شي يعتمد عليك أنت قرارات، علاقات، تشغيل… اهني المشتري يخاف. لأنه يدري أول ما يستلمه منك، المشروع يطيح

٢- الارقام مو واضحة
مو شرط تكون الأرقام سيئة… بس إذا مو مرتبه، مو مفهومة، مو دقيقة المشتري راح يتردد. مافي احد يبي ياخذ شي عمياني ولا مرتب ونظيف وعنده الاساسيات على الاقل

٣- مافي نظام واضح
إذا التشغيل كله موجود براسك بس والشغل يمشي بالخبرة والكلام، طبيعي المشتري راح يحس إنه قاعد يشتري مجهول وراح يتوهق فيه بعدين

مو لازم تبيع الحين… بس إذا سويت هالثلاث أشياء، مشروعك يصير أقوى بأي سيناريو

✅ ١- وثّق شغلك
اكتب طريقة التشغيل الأساسية، شلون اييك الطلب ؟ شلون ينفّذ؟ شلون يتحاسب؟ شلون يتسلم؟

✅ ٢- خل الأرقام واضحة
قسم دخلك وقسم مصاريفك واعرف هامش الربح لكل خدمة أو منتج عشان تعرف شنو اللي فعلاً يطلع فلوس وتقدر تتكلم بأرقام واضحة

✅ ٣- خفّف اعتماد المشروع عليك
ابدأ خطوة خطوة خل في شخص ثاني يعرف يمشي جزء من الشغل بدونك، ما اقولك شي نفسك نهائياً لان بداية المشاريع طبيعي تعتمد على صاحبها واهو الجوكر بس ضروري تحط خطة عشان تسحب نفسك شوي شوي وتركز على الاشياء الي تكبر البزنس وتطلع فلوس

الخلاصة

مشروعك قيمته مو بس بجم تربح، قيمته بـ شكثر يعطي أمان للي راح يستلمه بعدك

كل ما كان أوضح… كل ما كان أقوى… وكل ما صار “قابل للبيع” يوم من الأيام

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها