شلون تعرف ان هذا وقت توقف مشروعك؟

الاسبوع اللي طاف تكلمت عن اللحظة اللي الأرقام تكون مو زينة، بس إحساسك يقولك كمل

بس اليوم، أبي أتكلم عن العكس

لما الأرقام امورها طيبة، بس داخلك مو مرتاح، تحس إنك تشتغل… بس مو قاعد تستمتع وتعبان جداً

هذه اللحظة والظروف تمر على كل مبادر

وفي هذه اللحظة ادري تسأل نفسك تقول .. اوقف ولا اكمل ؟

التجارة مافيها دستور ولا قانون ولا فيها صح وغلط ولكن من تجربتي، في علامات إذا شفتها غالباً بكون هذا الوقت الي توقف فيها، اما بيع وتخارج من المشروع او التنازل عن الادارة

🎯 ٤ علامات لازم تنتبه لها

١- إذا فقدت الاحساس بالرحلة

تقوم كل يوم الصبح وتشتغل، بس بدون شغف، بدون هدف

تحس إنك ما قاعد تضيف شي جديد، بس تكرر نفس الشي كل يوم، مافي هدف ولا تارقت تبي توصله ومخك كله يفكر بشي مختلف والف فكرة ثانية

٢- اذا صار المشروع ياخذ منك أكثر مما يعطيك

كلنا نتعب، بس التعب المفيد يعطيك دافع

أما التعب اللي يخليك دايم مستنزف… معناته في خلل

٣- اذا كل قراراتك صارت بدافع الخوف، مو الطموح

خايف توقف؟ خايف تفشل؟ خايف الناس شتقول؟

هني أنت مو قاعد تدير مشروع، أنت قاعد تدير خوف

٤- اذا اكتشفت إنك ما تبي تكبر المشروع أكثر

النجاح مو دايم بالنمو، أحيانًا النجاح إنك تعرف متى توقف وتنتقل لمرحلة جديدة وتجرب شي جديد وتتعلم مهارات جديدة

انك اطق بريك أبداً مو فشل ولا خسارة، بس في شعره فرق بين الاستسلام والضعف وبين القوة والذكاء

الذكاء انك توقف وأنت بكامل وعيك وتجرب شي اخر قبل لا تستهلك نفسك ومشروعك وعلى علم ان الظروف القادمة ماراح تسمح لك في الاستمرار، شايفها وعايشها

الاستسلام انك خايف وتعبان وتبي توقف عشان ترتاح مو قاعد تتحمل الضغط والخوف ولا تبي تتحرك اكثر وتشد حيلك على الرغم ان في ايمان ان هذا المشروع بينجح والسوق يحتاج بس تحتاج صمله وصبر اكثر

رحلة المشاريع مو سهلة ولو سهلة جان الكل عنده مشروع وقاعد يطلع الملاين وفرحااان

تحتاج تشوف الموضوع من اكثر من زاوية وتستشير وتاخذ قرار بناءً على ارقام وواقع وليس على مشاعرك واحساسك الداخلي تجاه تعبك ونفسك بس، لان اذا بس بنعيش على مشاعرنا شنو تقولنا بس، من الطبيعي الانسان يبي يكون مرتاح ومستقر ولكن الخوف والحلم والطموح اهو الي يدفعة يجرب امور اطلعه خارج منطقة الراحة ف من الطبيعي مشاعرنا كل يوم تعبانه في تأسيس مشاريعنا لان كل يوم في تحدي وضغط ومشاكل فـ عشان جذي مايصير ناخذ قرار بناءً على مشاعرنا بس

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها