تخيل معاي... صاحب مشروع شغال عدل، أرباحه موجودة، عملاؤه راضين، وفجأة يقرر يدخل بمجال ثاني بالكامل ويقول "بكبر، بفتح شي ثاني، بدخل قطاع جديد"، تشوفه بعد سنة شغله يطيح، والمشروع الأصلي ضعف، والفلوس راحت. ليش يصير هذا؟

السؤال الحقيقي اللي لازم يسأله نفسه قبل ما يقرر... هل التوسعة الجديدة تعتمد على نفس قوتي الأصلية؟ ولا انا داخل بملعب جديد ما اعرف قوانينه؟

وايد ناس تتصور إن "التوسعة = نمو"، مو دائماً

التوسعة الصحيحة هي اللي تكبر فيها قوتك، مو اللي يتشتت فيها تركيزك

!!عبدالله وضح اكثر

إذا انت أحسن واحد بالكويت في تصميم المطابخ، وفجأة قررت تفتح مطعم لأن المطاعم ترند، انت ما توسعت، انت بلشت من الصفر بشي ما تفهم فيه

خلني اعطيك مثال شفته بعيوني... احد الاصدقاء عنده محل ملابس رجالية، بنى علاقات مع ٢٠٠ عميل دائم، ربحه شهري ثابت، واسمه معروف بالسوق. ياله واحد وقاله "ليش ما تفتح كافيه يا فلان، الكوفيات ترند". صاحبي تحمس، فتح كافيه صرف قرابة ال ١٠٠ الف من ديون واستثمار من الاهل والربع، صرف على الديكور، عيّن موظفين، اشترى مكاين... النتيجة؟ بعد ٨ شهور سكر الكافيه وخسر كل راس ماله وزود، والمحل الأصلي ضعف لأنه ما عاد يعطيه وقت مثل الأول

ادري كلنا ودنا يصير عندنا الف مشروع، بس وجود مشروع ثاني بخسرك الاثنين وكل شغلك

شلون تعرف إنك تلعب بأوراقك وما تلعب بأوراق غيرك؟

أول شي

اسأل نفسك شنو الشي اللي انت فيه أحسن من ٩٥٪ من الناس في سوقك الأصلي

روح وابني توسعك عليه مو بعيد عنه عشان تتميز وتصير سمعتك في كل بيت

ثاني شي

التوسعة الصح تصير بنفس العميل أو نفس المنتج، يعني نفس الزبون يشتري منك أكثر، أو نفس المنتج توسع توزيعه لمكان جديد

ثالث شي

إذا التوسعة تحتاج منك تتعلم صناعة جديدة من الصفر، هذه مو توسعة، هذي مشروع جديد بالكامل وراح ياكل من تركيزك ٧٠٪ ويخليك تهد مشروعك الأصلي بلا قائد وضايع

الزبدة

المشروع اللي يكبر بقوته الأصلية يرسخ ويبقى، أما اللي يطلع من ملعبه ويلعب بأوراق غيره يخسر بأول مرحلة وياكل من نجاحه القديم بدال ما يبني عليه

ما خاب من سأل واستشار، اضغط هنا

اخوك

شرايك بنشرة اليوم ؟ حتى لو ما عجبتك، رايك مهم

مالحقت على كل نشراتنا من البداية ؟ اضغط هنا وشوفهم

اذا تعرف احد بفيده هذا المحتوى، لا تبخل بالفائدة وشاركه هذا الايميل

واذا هذه النشرة واصله من صديق، اشترك مجاناً ليصلك جديدها