المشكلة الأولى اللي تواجه أي مشروع — وين عميلك؟

هذه أول نشرة من سلسلة أكبر مشاكل المشاريع

هذه مشاكل أشوفها تتكرر في مُشتري كل يوم، وكل أسبوع نناقش وحدة منها بشكل كامل

اكبر سبب يفشل فيه المشروع في بداياته مو المنتج ولا السعر ولا المنافسة

اهوا إن صاحبه ما يعرف وين يلاقي عميله

!!عبدالله وضح اكثر

وايد أصحاب المشاريع يبنون منتج أو خدمة، يفتحون انستقرام، يبدأون ينشرون، وينطرون العملاء ايون لهم. بس العميل ما ايي لانه ما يعرف إنك موجود. المشكلة مو في المنتج، المشكلة إنك تنطر اهم الي يلاقونك، بدال ما تروح أنت للمكان اللي اهم موجودين فيه

احد المشاريع عنده خدمة تصميم داخلي، قاعد ينشر على انستقرام من ٦ شهور وما حصل ولا عميل. سألته "وين يتجمع الناس اللي يبنون بيوت في الكويت؟" قال معارض البناء، قروبات واتساب حق ملاك العقارات، محلات المفروشات. فقلنا اهني نروح نسوق وناخذ عملاء. بدأ يحضر المعارض، يتواصل مع شركات العقار مباشرة، ويطلب من عملائه الحاليين يرشحون له احد من اهلهم وربعهم. خلال ٣ شهور ما يقدر يغطي الطلبات

ادري إن وايد منا يحس إن النشر على السوشيال ميديا كافي بس العميل الحقيقي مو دايماً على انستقرام، مرات وايد اسهل اروح لمكان احصلهم بشكل اسرع وقل تكلفة

أول شي

اسأل نفسك وين يتجمع عميلك في حياته اليومية، وين يسأل عن خدمتك، وين يثق بالتوصيات لان هذا المكان أهم من أي منصة

ثاني شي

تكلم مع عملاؤك الحاليين واسألهم وين سمعوا عنك وشلون وصلوا لك، جوابهم بيعطيك أفضل دليل وين تركز وقتك

ثالث شي

روح للمكان اللي فيه عميلك، معرض، مجموعة، جمعية، فعالية، الناس تشتري من الي تعرفه مو بس تشوف إعلانه

الزبدة

بالبداية العميل ما يدور عليك، انت تروح ادوره، وتبي تحصله بأقل وقت وتكلفة

الأسبوع القادم نتكلم عن المشكلة الثانية: تسعير الخدمة او المنتج

ما خاب من سأل واستشار، اضغط هنا

اخوك

شرايك بنشرة اليوم ؟ حتى لو ما عجبتك، رايك مهم

مالحقت على كل نشراتنا من البداية ؟ اضغط هنا وشوفهم

اذا تعرف احد بفيده هذا المحتوى، لا تبخل بالفائدة وشاركه هذا الايميل

واذا هذه النشرة واصله من صديق، اشترك مجاناً ليصلك جديدها