المشكلة الثانية — شلون تسعّر مشروعك صح؟

هذه ثاني نشرة من سلسلة أكبر مشاكل المشاريع

اكثر أصحاب المشاريع يقللون من سعرهم قبل ما يطلب العميل خصم. اهوا مو لأن السعر عالي بس لأنهم يظنون لو اهم الي بيشترون ماراح يدفون ويقولون غالي علينا وعليهم

!!وايد أصحاب المشاريع يحددون سعرهم بناءً على شنو يحسون إنه "منطقي" بدون ما يسألون العميل المشكلة إن السعر اللي تحدده بناءً على وضعك ينحش العميل اللي كان مستعد يدفع أكثر، وايبلك العميل الي السعر هو قراره الوحيد، وهذا دايماً أصعب ناس تتعامل معهم

احد المشاريع عنده خدمة استشارية، كان يعرضها بـ ٢٠٠ دينار. سألته "ليش ٢٠٠؟" قال "احس إنها منطقية ومريحة للعميل." قلت له "هل سألت عميلك شنو يحس؟" ماكان في اجابة

قلنا نجرب نرفع السعر لـ ٣٥٠ ونشوف. أول عميل دفع بدون ما يفاوض. ثاني عميل وافق، الثالث سأل اذا ممكن في خصم وقلنا له ان ماكو، ف قبل ودفع. ما خسر ولا عميل وفوق هذا هامش الربح زاد عنه بشكل مخيف

ادري إن رفع السعر يخوف، وادري لما يرفض العميل ومايدفع، أول شي ايي في بالك إن السعر هو السبب بس الأغلب السبب يكون شي ثاني تماماً. السعر مو المشكلة، انت اللي قررت إنه مشكلة قبل ما تسأل

أول شي

قبل ما تقلل سعرك اسأل نفسك "هل العميل طلب خصم؟" إذا الجواب لا، ف ماله داعي تسوي خصومات وتقلل سعرك. انت فقط افترضت إنه ما يقدر يدفع

ثاني شي

ارفع سعرك بنسبة ٢٠٪ على عميلك الجديد وشوف شنو يصير، العميل اللي يرفض بسبب السعر مو عميلك المثالي ف لاتزعل ان ما دفع

ثالث شي

حدد سعرك بناءً على القيمة اللي تعطيها مو على وقتك وجهدك، العميل يدفع على النتيجة اللي يحصل عليها مو على الساعات اللي تصرفها

الزبدة

دايماً اسأل نفسك، تبي تشتغل مع الف عميل ويطلع لك نهاية الشهر ٥ الف دك مثلاً

ولا تشتغل مع ١٠ عملاء ويطلعون لك نفسها ٥ الف دك ؟

كل ما قللت عدد العملاء ورفعت السعر، زاد التركيز وزادت القيمة والانتاجية وزاد الطلب على الخدمة والمشروع

الأسبوع القادم نتكلم عن المشكلة الثالثة: توسع المشروع السريع

ما خاب من سأل واستشار، اضغط هنا

اخوك

شرايك بنشرة اليوم ؟ حتى لو ما عجبتك، رايك مهم

مالحقت على كل نشراتنا من البداية ؟ اضغط هنا وشوفهم

اذا تعرف احد بفيده هذا المحتوى، لا تبخل بالفائدة وشاركه هذا الايميل

واذا هذه النشرة واصله من صديق، اشترك مجاناً ليصلك جديدها